O DEI VERBUM ATTRIBUTED TO BEATUS OF LIEBANA VIII CENTURY
I.
O Dei Verbum Patris ore proditum,
Rerum Creator, et verum principium,
Auctor perennis, lux, origo luminis,
Enixus alvo gloriosae Virginis,
Xriste tu noster revera Emmanuel,
II.
Rex, et sacerdos, cui sacri lapides
En ter quaterni onychinus, achates,
Nitens beryllus, saphirus, carbunculus,
Vel amethystus, sardius, topazius,
Maragdus, iaspis, ligurius, chrysolitus
III.
Riteque gemmis Sol, dies, duodenis
Enitens horis, margaritis optimis,
Inluxit mundo jam fugatis tenebris,
Et candelabro tibi superposito,
Micans lucernis bis senis Apostolis.
IV.
Petrusque Romam, frater ejus Achajam,
Indiam Thomas, Levi Macedoniam,
Jacobus Jebus, et Aegyptum Zelotes,
Bartholomaeus tenens Lycaoniam
Mathias Pontum, et Philippus Gallias.
V.
Magni deinde filii tonitrui,
Adepti fulgent prece Matris inclytae
Utrique vitae culminis insignia:
Regens Joannes dextram solus Asiam,
Ejusque frater potitus Hispaniam.
VI.
Clari Magistro, clateris innoxia
Adsciti dextram, pacis unus foedera
Tractus: sinistram alter in sententiam,
Utrique regna, bis electa pignora,
Mitridepoli properant ad gloriam.
VII.
Advectus, inquam, gloriosus praemio,
Electus isthinc abitur martyrio,
Christi vocatur Zebedaei Jacobus,
Apostolatus jure implens debita,
Victorque rapit passionis stigmata.
VIII.
Divino quippe obsitus suffragio
Idem Magorum sontes iras, daemonum
Coercens virus, punit aemulantia:
Vivaxque demum in stolis, oraculis
In signo detur poenitens cor credulum.
IX.
Perplexus olim voti compos commodat
Rima petenti aegro adminicula:
Optanti pandit fidei charismata,
Vexilla pacis ad salutis copiam,
Enseque functus se communit gloria.
X.
O vere digne sanctior Apostole
Caput refulgens aureum Hispaniae!
Tutorque nobis, et patronus vernulus,
Vitando pestem, esto salus coelitus:
Omnino pelle morbum, ulcus, facinus.
XI.
Adesto favens gregi, pius creditor,
Mitisque pastor gregi, clero, populo;
Ope superna ut fruamur gaudio:
Regno potiti vestiamur gloria
Aeterna: per te evadamus tartarum.
XII.
Praesta, quaesumus, Unica potentia,
Replensque gloria cunctam solus machinam,
Virtus perennis ingens, adesto gloria
Aeterna; cujus laus est et clementia;
Et honor jugis affatim per saecula.
Amen.